Luk 6 | KQC | STEP | Sabati meda yokoiri, Iesu ma ini usi dina vene sa witi muro idari nana diyadi. Ini usi dina vene yaku witi di ini ada koma resi ini vanari fufuta resi irigamadi.

a 6.1:Deut 23.25

b 6.3–4:1 Sam 21.1–6

c 6.4:Lev 24.9

f 6.22:1 Pet 4.14

g 6.23:2 Chr 36.16; Acts 7.52

h 6.31:Mt 7.12

i 6.39:Mt 15.14

j 6.40:Mt 10.24–25; Jn 13.16, 15.20

k 6.44:Mt 12.33

l 6.45:Mt 12.34

Luke 6

Sabati di ni kaitena ago

(Mt 12.1–8; Mk 2.23–28)

1 Sabati meda yokoiri, Iesu ma ini usi dina vene sa witi muro idari nana diyadi. Ini usi dina vene yaku witi di ini ada koma resi ini vanari fufuta resi irigamadi. ^a 2 Pharisee vene be yaku ni kaiteyadi, “Sabati meda di ago gira yaku nido bi makai ga refo vo nido.”

3 Iesu ni kabai resi niyo, “Ya bi bura veyadi beika David ini amiye sa yaku reyadi mirona medari rauna reyadi ri. ^b 4 Ina yaku Sei di yava ideri dui resi Sei rofu mana beredi moisi irisi ini vene ka maro. Ago gira ya nido una rofu bi tabu Sei ma amiye utari naivo vene maka bi mina beredi irigedi.” ^c

5 Resi niyo, “Amiye di Mida bi Sabati meda di ini Warika Amiye.”

Vana kevo amiye

(Mt 12.9–14; Mk 3.1–6)

6 Sabati meda yokoiri, usausa yavari dui resi amiye oteimaro ri, mironari bi amiye ini vana rama kevo nufa baku reyo. 7 Ago gira oteimana vene be ma Pharisee vene kiya Iesu vegamadi, gokai rego mina Sabati medari ini no dada nisi tourage regedi, mina amiye moi buni rigo ri. 8 Idu mina vene di mokena bi sena vesi mina vana kevo amiye rofu niyo, “Dadisi mina vene di nemokori are re.” Dadisi are reyo ri, bi 9 ina vene ni kaitesi niyo, “Beika vegu bi buni ago gira dudu Sabati medari regiya? Vana magiya o esika magiya? Amiye di vegu moi rigiya o umuyegiya?” 10 Resi ina vene yokoiyokoi rofu nene resi mina amiye rofu niyo ^{▼▼6.10niyo;bura bedakaigubuyo resi niyonufa.}, “Yi vana ae roto ri.” Resi reyo ri, bi ini vana dubusa dairi buni niyo.

11 Idu mina vene di mokena gubuyo yaku vata baiyo ma iniye ni vabi regamadi Iesu rofu beika regedi mina.

Iesu ini ni feidena vene tuero moiyo

(Mt 10.1–4; Mk 3.13–19)

12 Mina ariri bi, Iesu omuna yokoiri usausa nigi boyo, urusa doba Sei rofu usausa nigamo. 13 Aru uveyo ri, ini usi dina vene raka nisi tuero moisi ini roka maro bi ni feidena vene: 14 Simon (ini roka yokoi Iesu yaku ka niyo bi Peter) ma ini usika Andrew; James ma John, Philip ma Bartholomew, 15 Matthew ma Thomas, Alphaeus di mida James, ma Simon Zealot, ^{▼▼6.15 ZealotMina bi Rome vene meki regamo amiye yokoi. Auna rena ago di ini oteimana ago ideri baku re.} 16 James di mida Judas ma Judas Iscariot, kaere bi gabi Iesu di ini muyena ida riyo amiye.

Iesu amiye oteimasi gauka moi buni riyo

(Mt 4.23–25)

17 Kamini Iesu ina vene sa vakoi deyadi ma nomuri ini usi dina vene taugade sa are reyo. Judea gagani vene ma Jerusalem vene taugade, ma Tyre ma Sidon kone vene taugade ka minari; 18 ini okiyadi bi Iesu di ini sina neidegi ma ini gauka moi buni reyainedi. Ma kaere vima no ini rovaitari ka Iesu negau deyadi ina yaku moi buni regamo. 19 Amiye tau Iesu avaka moigika vo nisi regamadi adina vava ina rofu yakugamo ri, bi amiye tau buni nigamadi.

Ada rena ma iriyeduka rena

(Mt 5.1–12)

20 Iesu yaku ini usi dina vene rofu vesi niyo,

“Ya irava vene bi ada regedi,
adina Sei di ourefeidena amena sana bi yi!
21 Gua, ya rauna rededi vo nisi bi ada regedi;
Sei yaku yi iruku ya mago mironi ma yi uka bere nigedi!
Gua, ya isaka nidedi vo nisi bi ada regedi;
yoga nigedi mironi!
22 “Amiye yaku ya rofu gubuyo regedi ri, ya fufuta magedi ri, ago no ya rofu nibigedi ri ma yi roka moi no regedi ri, Amiye di Mida usi dina dada, bi ada regedi! ^f 23 Mina medari, mina rega vata nigo ri, bi ada resi adena ufa, adina yi obini omari moigedi bi tora. Idu ini tutubena vene ka mina vegu yokoimaka Sei di ago niyadi vene rofu sena reyadi. ^g

24 “Idu no baigo mironi ya kaere gua bi gugura tau vene,
yi vegu moi buni rena bi gua moigedi mini!
25 No baigo mironi, ya gua kaere iruku tau iridedi;
rauna regedi mironi!
No baigo mironi ya kaere gua yoga nidedi bi;
isaka niga guruo amegedi mironi!
26 “Amiye tau yaku ya ni buni regedi ri, bi no baigo ya rofu; yi tutubena vene yaku mina ago yokoimaka Sei di ago nidedi ofa vene rofu nigamadi.

Uka mana tuma vene rofu

(Mt 5.38–48; 7.12a)

27 “Na neidededi vene ya rofu nida: yi tuma vene rofu uka ma; ya rofu gubuyo rededi vene rofu bi buni re. 28 Ya karaini rededi vene rofu bi buni toragade ma; ya no rededi vene rofu bi Sei rofu usausa ni. 29 Amiye yokoi yaku yi ragena famago ri, bi berou ka ma kumo famaraine. Amiye yokoi yaku yi ideri varuka moigo ri, bi ferei kaini yi fafau varuka ka ma. 30 Kaere ya rofu ya usa nigo ri, bi mina ma; ma kaere ya rofu yi beika be moigo vo nisi, dairi ya marainedi bi ga ni. 31 Ya ura rededi amiye yaku ya rofu buni rebigedi kana, ya ka ina rofu makai refa. ^h

32 “Ye ya uka madedi vene maka uka magiya vo nisi bi gokai resi Sei buni toragade ya mago? Vegu no rededi vene ka ina rofu uka madedi vene maka rofu uka madedi! 33 Ma ya rofu buni rededi vene maka rofu buni regiya vo nisi bi gokai resi Sei buni toragade ya mago? Vegu no rededi vene ka makai rededi! 34 Ya ya diba ina dairisi ya magedi vo nisi maisa ri, bi gokai resi Sei buni toragade ya mago? Vegu no rededi vene ka vegu no rededi vene rofu madedi, maradi kana dairi moigi maka! 35 Idu yi tuma vene rofu uka ma. Vegu buni ina rofu resi masi ya rofu dairi moigiya di mokena bi ga moke. Makai dudu bi yi buni toragade moigiya resi ya bi Sei Odoro Iniye di ini mida vene. Adina ina kaya kaere amiye ina rofu ni buni de rededi vene ma vegu no rededi vene rofu ka mokei tora redo. 36 Amiye rofu iriyeduka re, yi Baba ka bi iriyeduka ya rofu redo kana.

Amiye be rofu kota rena

(Mt 7.1–5)

37 “Amiye di no rofu ga mokei no refa, ma Sei yaku ka yi no rofu mokei no de rego. Amiye be di nori ga ema, ma Sei ka yi nori de ya emago. Amiye di vegu no mokei toto nifa, ma Sei yaku yi vegu no mokei koina nigo. 38 Amiye be rofu ma, ma Sei yaku ya rofu mago. Yi dura moi vata baigo ri moi varakavaraka resi besa ma vata baibigo regasa rausi rebigo, kamini ya bi ya rofu beika rau regedi bi uka bere nigiya. Adina ya amiye gokai toe madedi kana, Sei yaku mina toe dairi ya mago.”

39 Ma Iesu yaku mokena ago ina vene rofu niyo, “Ne taufa amiye yaku ne taufa amiye bi de ourefeidego. Makai vakoi sokuri gogo keto regedi. ⁱ 40 Usi dina amiye yaku bi oteimana amiye de ebu rego, idu oteimado mokena tau mina ina tau noibanu yaku moigedi ri bi mo, ina oteimana amiye kana nigedi. ^j

41 “Beika resi bubudo yi dubuini di nemokori bi veisa, idu yabo reta yi nemokori bi de ni dodi reisa? 42 Gokai ida dudu, yi dubuini nigiya, ‘Dubu na ferei kumo yi nemokori bubudo amedo mina moigida,’ ma ya kaya yi nemokori yabo reta amedo bi de veisa? Ofarosi amiye, yi nemokori yabo reta amedo mina siko moi etagae regiya, mamo vei mona resi yi dubuini di nemokori bubudo amedo mina moi etagae re.

Yabo ma ini rama

(Mt 7.16–20; 12.33–35)

43 “Yabo buni yaku rama no de aido, ma yabo no yaku rama buni de aido. 44 Yabo yokoiyokoi bi ini rama dudu veitao regiya. Imiye yabori fuka de butu regiya. Waini di meko ka imiye yabo rofu de butu regiya. ^k 45 Amiye buni yaku ini ukari beika mokedo bi buni dada, vegu buni moi baido. Amiye no yaku ini ukari beika mokedo bi no dada, vegu no moi baido, adina vena yaku beika nido bi ukari amedo kana. ^l

Yava rina amiye remanu

(Mt 7.24–27)

46 “Ya vene bi na rofu bi ‘Warika Amiye’ vo nidedi, idu beika resi na yaku nida kana bi de rededi? 47 Amiye tau na rofu baisi, nai ago neidesi nida kana regedi bi ya oteimagida, ya bi gokai kana amiye. 48 Ina bi amiye yokoi yava akugamo kana, kono goisi guri iniye resi fore fafau ini yava moi are reyo. Kamini abata deyo ri, koru yaku nesi ini yava uyo ri de moi kita reyo, adina bi mina yava bi aku mona reyo dada. 49 Amiye kaere yaku nai ago neidesi de rego bi amiye yokoi kana kaere bi ini yava vasa fafau reyo; abata yaku ini yava uyo ri, bi minari maka yai reyo — ini mina yai reyo bi no iniye!”